কৃষিখণ্ডৰ উন্নয়নৰ বাবে এক মঞ্চ krixomnet

Wednesday September 27, 2017 , 2 min Read

অসম প্ৰাকৃতিকভাৱে শস্য শ্যামলা । অসমৰ কৃষি খণ্ডৰ বিপুল সম্ভাৱনীয়তালৈ লক্ষ্য ৰাখি krixomnet নামৰ এটা পৰ্টেল আৰম্ভ কৰা হৈছে । ইয়াৰ যোগেদি বিভিন্ন কৃষিভিত্তিক সেৱা আগবঢ়োৱা হ'ব । বৰ্তমান কৃষিভিত্তিক ই-কমাৰ্চ সেৱা আগবঢ়োৱা হৈছে । ইয়াৰ যোগেদি কৃষিজাত সামগ্ৰীৰ বিক্ৰীৰ ক্ষেত্ৰত মধ্যভোগীক আঁতৰ কৰাৰ লক্ষ্য লোৱা হৈছে । কৃষকসকলে তেওঁলোকৰ সামগ্ৰী পোনপটীয়াকৈ গ্ৰাহকৰ ঘৰত যোগান ধৰিব পাৰিব ।

এই কৃষিভিত্তিক ষ্টাৰ্টাপটোৰ আনুষ্ঠানিক উদ্বোধন কৰা হয় ২৪ ছেপ্টেম্বৰত উত্তৰ লক্ষীমপূৰ প্ৰেছ ক্লাবত । এই অনুস্থানত উত্তৰ লক্ষীমপূৰ প্ৰেছ ক্লাবৰ সভাপতি শৈলেন বৰুৱা, ড° অৰবিন্দ ৰাজখোৱা আৰু হেমন্ত মাধৱ গগৈৰ উপস্থিতিত কৃষমনেট উদ্বোধন কৰা হয় । কৃষমনেটৰ প্ৰতিস্থাপক ধ্ৰুৱজ্যোতি কাকতি, মানস প্ৰতীম চেতিয়া, শুভজিৎ খাউণ্ড আৰু লক্ষ্যজিৎ কলিতাই কৃষমনেট সম্পৰ্কে বিতং তথ্য প্ৰকাশ কৰে ।

'আমাৰ কেঁচা সামগ্ৰী, আমাৰ প্ৰস্তুতি আৰু আমাৰ ক্ৰয়' নীতিৰে পৰিচালিত কৃষমনেট ডট কমে কৃষক আৰু ক্ৰোতাৰ মাজৰ এক মঞ্চ হিচাপে সেৱা আগবঢ়োৱাৰ লক্ষ্য লৈছে । ভাৰতীয় মানুহৰ ৭০ শতাংশই কৃষিজীৱি । এই খণ্ডটোৰ ওপৰত গুৰুত্ব দিলে ই কেৱল কৃষকৰ জীৱন উন্নত কৰা আৰু খাদ্যৰ প্ৰয়োজনীয়তা পূৰণ কৰাই নহয় নিবনুৱা সমস্যাৰ সৈতে যুঁজ দিয়াৰ ক্ষেত্ৰতো গুৰুত্বপূৰ্ণ ভুমিকা পালন কৰিব ।